Иллюстратив фото

НАТО аъзо ҳисобланган Европадаги учта давлат, Франция, Италия ва Чехия Украина учун Америка қуролларига пул тўлаш ташаббусида иштирок этмоқчи эмас. Бу ҳақда «Politico» нашри хабар қилди.

Франция салбий позициясига сабаб қилиб айни пайтда ҳукумат бюджет тақчиллиги билан курашишга уринар экан, ўзининг мудофаа харажатларини оширишда қийналаётгани ҳамда ички харидлар орқали ўз мудофаа саноатини ривожлантириши зарурлигини кўрсатган.

Италия ҳам ушбу ташаббус учун бюджет имкониятлари деярли йўқлиги ва харидларни тўлаш ташаббусига қўшилишни истамаслигини билдирди. Шунингдек, Италия Мудофаа вазирлигининг манбаларида ҳеч қачон Америка қуролларини сотиб олиш ҳақида гап бўлмагани айтилган.

Ташаббусга қарши бўлган учинчи давлат эса Чехиядир. Мамлакат бош вазири Петр Фиала давлат Украина учун Америка қуролларини сотиб олишда иштирок этиш ниятида эмаслигини айтди.

«Чехия «Чехия ўқ-дорилари ташаббуси» каби Украинани қўллаб-қувватлашнинг бошқа лойиҳалари ва йўлларига эътибор қаратмоқда. Шунинг учун, ҳозирги босқичда биз ушбу дастурда иштирок этмоқчи эмасмиз», деган у нашри учун берган шарҳида.

Асосий ташаббускор

Нашр маълумотларига кўра, Германия Украинага Америка қурол-яроғи етказиб бериш учун пул тўлаш ғоясининг асосий ташаббускорларидан биридир. Германия канцлери Фридрих Мерц яқинда АҚШ Президенти Дональд Трамп билан бир неча бор гаплашган ва уни Германия қуролларни етказиб беришда етакчилик қилишига ишонтирган.

Канцлернинг фикрича, Америка қуролларини сотиб олиш Европанинг чекланган ишлаб чиқариш имкониятларини ҳисобга олганда, Украинани зарур воситалар билан тезда таъминлашнинг асосли йўлларидан бири.

Аввалроқ «Axios» нашри Трамп Украинага ҳужумкор қуролларни ўз ичига олган янги қурол-яроғ «жўнатма»сини юбориш тўғрисидаги режасини маълум қилиши ҳақида ёзганди. Унда ушбу қуроллар Россия ҳудудининг ичкарисидаги нишонларга, жумладан, Москвага зарба бера оладиган узоқ масофали ракеталарни ўз ичига олган бўлиши мумкинлиги айтилган.

Шундан сўнг, Европа Иттифоқи Киевга ёрдамни молиялаштиришга Вашингтоннинг ҳам қўшилиши кераклигини таъкидлади. Бу ҳақда Европа Иттифоқининг ташқи ишлар ва хавфсизлик сиёсати бўйича олий вакили Кая Каллас айтиб ўтган.