Қўшма Штатлар раҳбари Дональд Трампнинг билдиришича, Европа етакчилари душанба ёки сешанба куни АҚШга ташриф буюриб, Украинадаги урушни тугатиш йўлларини муҳокама қилади. Бу ҳақида «BBC News» нашри хабар берди.

Маълум қилинишича, АҚШ президенти Дональд Трамп Россия етакчиси Владимир Путин билан ҳам тез кунда яна гаплашишини айтган. Шунингдек, Москвага нисбатан санкцияларнинг иккинчи босқичига ўтишга тайёрлигини ҳам қўшимча қилган.

«Европанинг айрим етакчилари Россия-Украина урушини муҳокама қилиш учун бугун, 8 сентябрь ёки эртага, 9 сентябрь куни якка тартибда мамлакатимизга келади», — деган Трамп.

АҚШ раҳбари айнан қайси Европа мамлакатлари раҳбарлари Қўшма Штатларга ташриф буюриши ҳақида аниқ гапирмаган.

Украина президенти Владимир Зеленский АҚШ томонидан Россияга нисбатан қўлланилаётган санкцияларни қўллаб-қувватлаб, Европа мамлакатларини Россиядан энергия ресурслари сотиб олишни тўхтатишга чақирган.

«Биз Россиядан энергия ресурсларининг ҳар қандай турини сотиб олишни тўхтатишимиз керак. Агар биз уларни тўхтатмоқчи бўлсак, Россия билан ҳеч қандай битим тузмаслигимиз лозим. Россия билан шартномалар тузишда давом этаётган давлатларга божлар киритиш ғояси, менимча, бу тўғри фикр», — деган Зеленский.

АҚШ молия вазири Скотт Бессентнинг билдиришича, Қўшма Штатлар Россия нефтини сотиб олувчи давлатларга иккиламчи божлар жорий қилиш учун Европа Иттифоқидан  ёрдам кутмоқда.

«Агар Европа Иттифоқи давлатлари Россия нефтини сотиб олувчи давлатларга нисбатан санкциялар ва иккиламчи тарифларни оширса, Россия иқтисодиёти бутунлай таназзулга юз тутади ва бу президент Путинни музокаралар столига олиб келади. Биз ҳозир Украина ҳарбийларининг қанча вақт тура олиши ҳамда Россия иқтисодиётининг қанча муддатга бардош бера олиши бўйича пойга ўйнаяпмиз», — дейди Бессент.