Адлия вазирлиги томонидан «Электрон тижоратда курьерлик хизмати фаолиятини амалга ошириш тартиби тўғрисида»ги низом давлат рўйхатидан ўтказилди. Ҳужжатга мувофиқ, низом 2025 йил 18 июнда 3631-сон билан расман қабул қилинди.

Низомда электрон тижорат соҳасида курьерлик хизматини амалга оширишнинг ҳуқуқий ва амалий тартиблари белгилаб берилган. Жумладан, курьер — тадбиркорлик субъектлари ёки етказиб бериш хизматлари операторлари билан меҳнат шартномаси ва ёки фуқаролик-ҳуқуқий шартномалар асосида товарларни етказиб берувчи жисмоний шахс сифатида эътироф этилади. Шунингдек, курьер сифатида ўзини ўзи банд қилган шахслар ҳам фаолият юритиши мумкин.

Низомга кўра, шартномада белгиланган ҳолларда, етказиб бериш хизмати операторлари ва курьерлар харидорлардан товар ва етказиб бериш хизмати учун тўловларни қабул қилиш ҳуқуқига эга бўлади. Бунда назорат-касса техникасидан фойдаланиш ва харидорга электрон ёки қоғоз шаклида чек ёки квитанция тақдим этилиши мажбурий ҳисобланади.

Озиқ-овқат маҳсулотларини етказиб беришда алоҳида талаблар қўйилган. Хусусан, транспорт воситалари ва термоконтейнерлар доимий равишда тоза ва соз ҳолатда сақланиши, мунтазам ювилиши ва дезинфекция қилиниши лозим.

Шунингдек, низомда курьерларга қатор тақиқлар ҳам белгиланди. Жумладан, курьер товарнинг қадоғини ўзбошимчалик билан очиши мумкин эмас. Шунингдек, харидорларнинг шахсий маълумотлари ёки етказиб берилаётган товар ҳақидаги маълумотларни учинчи шахсларга ошкор қилиш мутлақо ман этилади.

Мазкур низом электрон тижорат соҳасини тартибга солиш, курьерлик хизматини шаффоф ва қонуний асосда ташкил этиш ҳамда харидорларнинг ҳуқуқларини ҳимоя қилишга хизмат қилади.