Фото: www.google.com

Сайёрамизнинг энг бадавлат 500 одамининг умумий бойлиги охирги ҳафтада 444 млрд долларга камайди. Бу бутун дунё бўйлаб биржа индексларининг пасайиши сабабли юз берди.

Бу ҳақда Bloomberg ахборот агентлиги ёзмоқда. Таъкидланишича, тадбиркорларнинг бу йўқотишлари уларнинг 2020 йил бошидан бери қўлга киритган даромадларидан кўпроқни ташкил қилган. Энг катта йўқотишларга Amazon раҳбари Жефф Безос учраган, унинг капитали 11,9 млрд долларга камайган.

Шунингдек, бозорлардаги қулашдан Microsoft асосчиси Билл Гейтс ва LVMH компаниялари гуруҳи эгаси Бернар Арнога ҳам жиддий зиён етган – улар мос равишда 10 ва 9 млрд доллардан йўқотишган.

Йўқотишлар катталиги бўйича 4-ўринда Илон Маск жойлашган. Америкалик тадбиркор Tesla компанияси акциялари қадрсизланиши оқибатида 9 млрд доллар йўқотган. Ўз навбатида, таниқли сармоячи Уоррен Баффет 8,8 млрд доллардан маҳрум бўлган.

Ахборот агентлигининг ёзишича, биржа курсларининг пасайиши дунёнинг энг бой одамларининг 80 фоизига таъсир кўрсатган.

Мутахассислар бундай салбий кўрсаткичларни коронавирус эпидемияси ва Хитойда бу вазият сабабли иқтисодий пасайиш кузатилиши мумкинлиги хавотири билан боғлашмоқда.