Фото: Oliygoh.uz

Чет тилини билиш даражасини аниқлаш бўйича бўлиб ўтадиган навбатдаги имтиҳонлар санаси маълум қилинди. Бу ҳақда Билимни баҳолаш агентлиги хабар берди.

Имтиҳоннинг ёзма босқичи 10–11 ва 14–19 май кунлари ўтказилади. Гапириш кўникмасини баҳолаш имтиҳонлари эса 12 майдан 13 июнгача бўлган муддатда, шанба, якшанба ва байрам кунларидан ташқари кунларда бўлиб ўтади.

Талабгорлар ўз имтиҳон куни, манзили ва аниқ вақтини мй.гов.уз портали орқали «Менинг аризаларим» бўлимидан билиб олиши мумкин. Шу бўлимдан рухсатнома ҳам юклаб олинади. Рухсатномада тест синовида қатнашиш вақти ва жойи аниқ кўрсатилади. Талабгорлардан белгиланганган вақтдан кечикмасдан имтиҳон биносига етиб келишлари сўралмоқда.

Тест синови ўтказиладиган биноларга фақатгина шахсни тасдиқловчи ҳужжат – паспорт ёки ID-карта орқали кириш мумкин. 1-смена учун кириш соат 7:00 дан 8:30 гача амалга оширилади. Соат 8:30 дан кеч қолганлар тест синовига киритилмайди. 2-смена учун эса кириш 13:00 дан 14:30 гача давом этади ва бу вақт ўтгач келган талабгорларга тестда қатнашишга рухсат берилмайди.

Маълумот учун, ушбу тест синови натижалари Вазирлар Маҳкамасининг 73-сон қарорига мувофиқ 20 июн куни эълон қилинади. Шу сабабли, талабгорлардан имтиҳон тартиб-қоидаларига қатъий риоя қилиш ва белгиланган талабларга амал қилиш сўралади.