БМТнинг Жаҳон метеорология ташкилоти (ЖМТ) ҳузуридаги гидрология, сув ва криосфера бўлими раҳбари Стефан Уленбрукнинг маълум қилишича, 2024 йил ёғингарчилик ҳажми бўйича аномал йил сифатида қайд этилди.

Унинг сўзларига кўра, кўплаб ҳудудларда ёғин одатдагидан кўпроқ бўлган. Жумладан, Жанубий Осиё, Покистон, Ҳиндистоннинг айрим ҳудудлари, шунингдек, Марказий Африканинг ғарбий қисмидаги Сахел минтақасида ёғин меъёридан ошиб кетган. Шунингдек, Марказий Осиё ва Россиянинг катта қисмида ҳам ёғингарчилик одатдагидан юқори қайд этилган. Аксинча, Африканинг жанубий ҳудудлари ҳамда Жанубий Американинг катта қисмида ёғин миқдори кескин камайган.

— Ёғингарчиликдаги бу ўзгаришлар маҳаллий дарёлардаги сув сатҳига ҳам таъсир кўрсатди, — деди Уленбрук ЖМТнинг йиллик «Сув ресурслари ҳолати» ҳисоботини тақдим этар экан.

Маълумотларга кўра, ўтган йилда глобал сув ҳавзаларининг қарийб 60 фоизида дарё оқимининг нормал кўрсаткичлардан оғиши кузатилган. Мутахассислар таъкидлашича, сўнгги олти йил давомида дунё бўйича сув ҳавзаларининг атиги учдан бир қисми 1991–2020 йиллардаги ўртача кўрсаткичларга мос келган.