Беларусь ўз ракеталарини ядровий каллаклар билан жиҳозлаш имкониятини муҳокама қилмоқда. Мамлакат хавфсизлик Кенгаши котиби Александр Волфовичнинг БелТА агентлигига берган интервюсига кўра, Минск «Полонез» ракета тизимини модернизация қилиш орқали унга ядровий каллаклар ўрнатиш йўлларини ўрганмоқда.

Волфовичнинг таъкидлашича, шу билан бирга Россиянинг «Орешник» гиперсоник ракета технологияларини қўшма лойиҳаларга интеграция қилиш масаласи ҳам кўриб чиқилмоқда.

«Биз қўшниларимиз, Ғарб давлатлари ва АҚШ 600 километр ёки ундан ҳам кўпроқ масофани босиб ўтадиган шунга ўхшаш ракеталарни яратаётганини кўряпмиз. Биз ҳам бу йўналишда ҳаракатни давом эттиришимиз керак», — деди у.

Беларусь президенти Александр Лукашенко ҳам аввал Ғарб қўшнилари томонидан ҳарбий таҳдидлар кучайиб бораётганини таъкидлаб, Минскни ракета саноатини ривожлантиришга мажбур этганини билдирган эди. «Полонез» тизими Хитой билан ҳамкорликда ишлаб чиқилган бўлиб, 300 километр масофадаги нишонларни йўқ қилиш имкониятига эга.

Шу билан бирга, Минск ҳозирча ўзининг ядро қуролларига эга эмас. Аммо мамлакат ҳудудида Россиянинг тактик ядровий ўқ-дорилари жойлаштирилган бўлиб, улар Москва назорати остида қолмоқда.