Барча мактабларда Президент мактабларининг баҳолаш тизими жорий этилади. Бу ҳақида Таълим назорати Telegram-канали хабар берди.

Президент Шавкат Мирзиёевнинг «Мамлакатнинг 2030 йилгача мўлжалланган тараққиётининг устувор йўналишлари доирасида ислоҳотларни изчил давом эттириш ва янги босқичга олиб чиқишнинг қўшимча чора-тадбирлари тўғрисида»ги Фармони лойиҳаси «regulation.adliya.uz» порталига жамоатчилик муҳокамаси учун жойлаштирилди.

Унга кўра мактабгача таълим тизимини янги босқичга олиб чиқиш ҳамда болаларнинг тўлиқ қамровини таъминлаш мақсадида 2030 йилгача:

• болаларни мактабгача таълим билан қамраб олиш даражасини 80 фоизга етказиш;
• мактабгача таълим ташкилотларини 100 фоиз тоза ичимлик суви ва замонавий санитария-гигиена инфратузилмаси билан таъминлаш;
• болаларни мактабга тайёрлов гуруҳлари билан 100 фоиз қамраб олиш режалаштирилмоқда.

Шунингдек, муҳокама учун эълон қилинган Президент Фармони лойиҳасига асосан умумий ўрта таълим тизимини янги босқичга олиб чиқиш мақсадида 2030 йилгача:

• 1 000 та номдаги янги авлод дарслик мажмуаларини (дарслик, машқ дафтарлари, педагоглар учун методик қўлланмалар) чоп этиш;
• Янги авлод дарсликлари асосида планшетлар учун 1 000 та мультимедиа дастурларини яратиш;
• Таълим ташкилотларига ҳар йили 600 нафар «тил эгалари» бўлган хорижий мутахассисларни жалб этиш;
• Президент ва ихтисослаштирилган мактабларнинг баҳолаш тизими жорий этилган умумий ўрта таълим муассасалари улушини 100 фоизга етказиш режалаштирилган.