Вашингтон ва Пекин ўртасидаги савдо можаросидан бошқалардан кўра кўпроқ Вьетнам ютди. Ушбу мамлакат ялпи ички маҳсулоти кутилганидан ҳам зиёда бўлди.

АҚШ ва Хитой ўртасидаги савдо урушида Вьетнам ғалаба қозонди, деб ёзади “Ведомости”. Вьетнамда ЯИМ II чоракда 6,71 фоиз ошди. Гарчи ўсиш биринчи чоракдаги(6,82 фоиз)га нисбатан секинлашган бўлса-да, таҳлилчилар прогнозидан яхшироқ натижа қайд этилди.

Financial Times ҳам Вашингтон ва Пекин ўртасидаги тижорий қарама-қаршиликлардан Осиё мамлакатлари ичида энг кўп Вьетнам ютганини таъкидлади. Унинг баҳолашича, АҚШга Вьетнамдан импорт 2019 йилнинг дастлабки тўрт ойида ўтган йилнинг шу давридагига нисбатан 40 фоиз ўсган. Шу пайтда Хитойдан АҚШга экспорт 13 фоиз қисқарган.

Айни пайтда Вашингтон 250 млрд. долларлик хитой товарлари импортига 25 фоизлик бож қўйган ва бу кўрсаткични 300 млрд. долларгача кўтариши ҳам мумкин. Шундай қилиб АҚШга келадиган Хитой импортининг деярли барчасига нисбатан бож қўйилади.

Осиё тараққиёт банки прогнозларига кўра, савдо можароси кескинлашадиган бўлса, Вьетнам ялпи ички маҳсулоти яқин икки йил ичида яна 2 фоиз ўсиши мумкин. Мамлакат божга тушган кўплаб товарларни сотаётгани учун фойда оляпти. Боз устига, бунгача бир нечта компаниялар ўз ишлаб чиқаришларини Вьетнамга кўчирган эди. Мамлакат уларни анча арзон ишчи кучи ва унча қатъий бўлмаган иқтисодий нормалар эвазига жалб этган. Ўтган йил Вьетнамга тўғридан-тўғри инвестициялар ҳажми 18 млрд. долларни ташкил қилгани буни тасдиқлайди.

The Wall Street Journal нашрида ёзилишича, кўплаб экспортчилар маҳсулотларини Хитойдан Вьетнамга олиб келмоқда. Уларга бироз ишлов бериб, сўнгра Вьетнам товарлари сифатида АҚШга қайта экспорт қиляпти. Вьетнам расмийлари эса бунга қарши курашишга ваъда берган.

Ханой бундан олдин ҳам худди шу каби воситачилик ролини ўйнаган. Кўп йиллар давомида у хитой пўлатини АҚШга реэкспорт қилган. Шу йўл билан ХХРга божларни айланиб ўтишга ёрдам берган.

Ўшанда Вашингтон Вьетнамда пўлатнинг бир неча турлари учун пайдо бўлаётган қўшимча қиймат арзимас деган хулосага келган бўлса-да, 2018 йил майда мазкур маҳсулотга нисбатан 250 фоизлик бож қўйди.