Андижон вилоятида табиий сув манбаларини асраш ҳамда уларга туташ ер майдонларидан оқилона фойдаланишга қаратилган ишлар янги босқичга чиқди. «Норин – Қорадарё» ирригация тизимлари ҳавза бошқармаси тасарруфидаги 1 та дарё ва 5 та табиий сой атрофидаги ҳудудлар тўлиқ хатловдан ўтказилди. Натижада 247,4 километр соҳил бўйлаб ҳимоя зоналари аниқ белгиланди.

— Мазкур ҳудудлар эндиликда қонунчилик талабларига мувофиқ сув хўжалиги ташкилотларига доимий фойдаланиш ҳуқуқи асосида расмийлаштирилди, — дейди «Норин – Қорадарё» ирригация тизимлари ҳавза бошқармаси бошлиғи Иқболжон Тоҳиров. — Бу жараёнда маҳаллий ҳокимликлар билан ҳамкорликда ижара шартномалари қайта кўриб чиқилиб, 995 та шартнома белгиланган тартибда янгиланди. Бу эса сув фонди ерларидан фойдаланишда тартиб ва масъулиятни янада мустаҳкамлайди.

Айни пайтда мазкур ҳудудларда ёрдамчи хўжаликлар фаолият юритмоқда. Жумладан, уларда 200 бошдан ортиқ қорамол, 4,5 минг бош қўй-эчки ва 15 мингга яқин парранда боқилмоқда. Шунингдек, асаларичилик, балиқчилик ва экин экиш ишлари ҳам йўлга қўйилиб, сув ҳавзалари атрофида барқарор ишлаб чиқариш муҳити шаклланмоқда.

Саминжон ҲУСАНОВ, «Халқ сўзи».