Bundan ikki-uch hafta avval dunyoda epidemiologik vaziyat birmuncha izga tusha boshlaganidan quvongandik. Kunlik kasallanish koʻrsatkichlari sezilarli darajada pasayishi esa pandemiya oxirlayotganidan darak bergandek ham edi oʻshanda.

Ammo, mana, ikkinchi haftadirki, ahvol yana murakkablashmoqda. Qator davlatlarda oʻsish dinamikasi kuzatilyapti. Jahon sogʻliqni saqlash tashkiloti ushbu holatga nisbatan oʻz jiddiy xavotirini bildirib, buning eng asosiy sabablarini izohladi.

Tashkilot rahbari Tedros Gebreyesusning taʼkidlashicha, «omikron» koronavirusning soʻnggi versiyasi ekanligi, qolaversa, pandemiya tugagani haqida tarqatilayotgan ayrim asossiz axborotlar odamlarni chalgʻitmoqda.

JSST eksperti Mariya Van Kerxove ham bu fikrni qoʻllab-quvvatlab, «omikron»ning BA.2. mutatsiyasi koronavirusning hozirgacha maʼlum eng yuqumli varianti ekanligini qayd etdi.

Toʻgʻri, mazkur yangi shtamm avvalgi versiyalarga nisbatan oʻta ogʻir asoratlarni keltirib chiqarmaydi. Ammo uning keng tarqalishi shifoxona sharoitida davolanuvchilar soni yana ortishiga sabab boʻlmoqda.

Shunday sharoitda odamlarning karantin qoidalariga mutlaqo rioya qilmay qoʻygani, beparvolikka berilayotgani xavf koʻlamini tobora oshiryapti.

JSSTning favqulodda vaziyatlar dasturi ijrochi direktori doktor Mayk Rayan ham shu haqda toʻxtatilib, hozircha koronavirus “tinchlangan”i, ammo bu mavsumiy boʻlishi mumkinligidan ogohlantirdi.

Mutaxassisning soʻzlariga koʻra, COVID-19 hamon xavfli. Qolaversa, hozir bahor, odamlarning immuniteti birmuncha zaiflashgan. Bunday sharoitda infeksiya oson tarqalishi mumkin.

Shu sababli shifokorlar emlashning muhimligini bot-bot eslatishmoqda. Chunki kasallikdan oʻlim holatlarining aksariyati emlanmagan yoki toʻliq bosqichda vaksina olmaganlarda sodir boʻlyapti.

Van Kerxovening eslatishicha, COVID-19 qarshi vaksinalar kasallikning va undan oʻlim holatlarining oldini olishda eng samarali vositadir.