Bosh prokuratura huzuridagi Departamentning Zafarobod tumani boʻlimi va IIB xodimlari hamkorligida tezkor tadbir oʻtkazildi, deb xabar bermoqda Iqtisodiy jinoyatlarga qarshi kurashish departamenti.

Unda aytilishicha, oʻtkazilgan tezkor tadbir davomida fuqaro A.A. tarkibida kuchli taʼsir qiluvchi moddalari mavjud boʻlgan 1 800 dona “Slimming 30” nomli dori vositasini 3,6 million soʻmga sotganligi maʼlum boʻlgan.

Shu kabi yana bir holat, departamentning Mirzachoʻl tumani boʻlimi va IIB xodimlari hamkorligida oʻtkazilgan tezkor tadbirda ham aniqlangan.

Unga koʻra, fuqaro J.M. 14 quti “Omnadren 250” nomli dori vositasini sotganligi fosh qilingan.

Hozirda mazkur holatlar yuzasidan Jinoyat kodeksining 251-1-moddasi (giyohvandlik vositalari, ularning analoglari yoki psixotrop moddalar hisoblanmaydigan kuchli taʼsir qiluvchi moddalarni targʻib qiluvchi mahsulotni tayyorlash, tarqatish, reklama qilish, namoyish etish yoki bunday moddalarni yoxud zaharli moddalarni qonunga xilof ravishda muomalaga kiritish) bilan jinoyat ishi qoʻzgʻatilib, tergov harakatlari boshlab yuborilgan.