Kecha, 8-iyul kuni OʻzA Oʻzbekiston ilmiy-sinov va sifat nazorati markazi — “UzTest” Buxoro viloyati hududiy filialida katta oʻgʻirlik sodir boʻlgani haqida xabar tarqatdi. Oʻzbekiston texnik jihatdan tartibga solish agentligi mazkur holat yuzasidan rasmiy munosabat berdi.

Bildirilishicha, haqiqatan ham “UzTest” Buxoro hududiy filialida qiymati 150 million soʻmlik “Tormoznoy stend” sinov uskunasi hamda 250 million soʻmlik gazballonlarni oʻlchash vositalari oʻgʻirlangan.

Mazkur holat agentlikning Komplaens nazorat boʻlimi tomonidan oʻtkazilgan oʻrganishlar davomida aniqlangan va bu haqda hujjatlar 2024-yilning noyabr oyida Buxoro viloyati huquqni muhofaza qilish idoralariga yuborilgan. Maʼlum qilinishicha, aniqlangan holat yuzasidan surishtiruv ishlari olib borilmoqda.

“Markaz tomonidan yuqoridagi holatlarga oid surishtirish ishlari yakunlangach qoʻshimcha maʼlumotlar taqdim etiladi”, deyiladi munosabatda.

Shuningdek, OʻzA xabarida Oʻzbekiston ilmiy-sinov va sifat nazorati markazida (“UzTest”) 6 mlrd soʻm mablagʻni maqsadsiz sarflab yuborilgani ham qayd etilgan. Agentlik bu maʼlumotlar xususida ham toʻxtalib, “bu xabarlar hech qanday haqiqatga toʻgʻri kelmaydi va mutlaqo asossiz” ekanini taʼkidladi.

Qayd etilishicha, agentlik Komplaens nazorati boʻlimi tomonidan tizim tashkilotlari, shu jumladan, Markazning moliyaviy faoliyati ustidan doimiy monitoring oʻrnatilgan.