2023-yil 19-oktyabr kuni Samarqand shahrida BMT Butunjahon turizm tashkilotining 25-Bosh Assambleyasi doirasida “Global Forum on Education: The Foundation of Building Tourism” Xalqaro taʼlim forumi oʻtkaziladi. 

Forum davomida quyidagi tadbirlar boʻlib oʻtishi kutilmoqda:

Dunyoning 10 mamlakatidan taʼlim va turizm sohasi rahbarlari ishtirok etadigan Vazirlar yalpi sessiyasi. Rahbarlar munozaralar davomida hozirgi va kelajak avlodlar uchun taʼlim sohasida innovatsiyalarni joriy etish masalalarini batafsil koʻrib chiqishadi. Sessiyada IE Universitetining iqtisodiy masalalar boʻyicha vitse-prezidenti, Tadbirkorlik va innovatsiyalar markazi raisi Janob Xuan Xose Guemes moderatorlik qiladi.  

Taʼlim sohasidagi yetakchi ekspertlarning “Taʼlim sohasidagi UNWTO faoliyati”, “Ertangi kunning investitsiyalari: cheksiz kelajak uchun transformatsiya, texnologiya, innovatsiya va taʼlim” mavzularidagi maʼruza va taqdimotlari boʻlib oʻtadi. 

Shu bilan birga, Oʻzbekiston, AQSH, Shveytsariya, Singapur, Hindiston, Xitoy, Janubiy Koreya, Ispaniya, Gretsiyadan 7 nafar spiker, shu jumladan, turizm sohasida Oʻzbekiston yoshlar yetakchilari ishtirok etadigan yalpi majlis oʻtkaziladi. Majlisda oʻrta maktabdan oliy va ijro etuvchi taʼlimgacha boʻlgan turli bosqichlarda talabalarning turli ehtiyojlarini hisobga olgan holda yaxlit yondashuv taqdim etiladi, bu turizm sanoatining oʻsib borayotgan ehtiyojlarini qondirish uchun muhim ahamiyatga ega.

Yana bir diqqatga sazovor tadbir Oʻzbekistondagi UNWTO Turizm akademiyasining taqdimotiga bagʻishlanadi. 

Bundan tashqari, Turizm va taʼlim sohasidagi ulkan yutuqlar va tashabbuslar uchun “Ulysses Awards UNWTO” mukofoti taqdimotining tantanali marosimi ham rejalashtirilgan. 

Turizm sohasida milliy va xorijiy taʼlim muassasalari oʻrtasida memorandumlar imzolash marosimi kutilmoqda. 

Turizm sohasidagi yetakchi olimlar va mutaxassislar oʻz maʼruzalari bilan ishtirok etishadi. 

Forumga turizm sohasidagi yetakchi taʼlim tashkilotlari, shuningdek, 30 mamlakatdan yetakchi xalqaro tashkilotlar vakillari kelishi kutilmoqda.