Hukumat qarori bilan “Turistik klasterlarni tashkil etish va ularga turistik klaster maqomini berish tartibi toʻgʻrisida”gi nizom tasdiqlandi.

Nizomga koʻra, turistik klaster maqomi kompleks turistik xizmatlar hamda turistning va ekskursantning ehtiyojlarini qanoatlantirish uchun zarur boʻlgan boshqa qoʻshimcha xizmatlar koʻrsatuvchi mustaqil tashkilotlar hamda yakka tartibdagi tadbirkorlar guruhiga beriladi.

Turistik klasterlar belgilangan tartibda turistik klaster maqomi toʻgʻrisidagi guvohnomani olgan paytdan boshlab tashkil etilgan hisoblanadi.

Turizm qoʻmitasi turistik klaster maqomini berish boʻyicha vakolatli organdir. Bunda ariza beruvchi elektron shaklda yoki pochta orqali belgilangan shakldagi ariza bilan vakolatli organga murojaat qiladi.

Turistik klasterlarni tashkil etish va turistik klaster maqomini olish uchun tadbirkorlik subyektlari quyidagi talablarga javob berishi lozim, jumladan:

turistik klaster faoliyati turoperator – mehmonxona – transport xizmatlarini koʻrsatish bilan toʻliq qamrab olinganligi;

turistik klaster hududida sigʻimi kamida 40 nafar mehmon uchun moʻljallangan joylashtirish vositasining mavjudligi;

turistik klaster hududida mahalliy hunarmandchilik mahsulotlarini (esdalik sovgʻalari) sotish shoxobchalari (kamida bitta savdo nuqtasi) mavjudligi.