Illyustrativ foto

Toshkent shahar hokimining qarori bilan “Veolia Energy Tashkent” tomonidan koʻrsatiladigan markazlashgan issiqlik taʼminoti xizmatlari uchun yangi tariflar tasdiqlandi.

Qarorga muvofiq, issiqlik taʼminoti xizmatlari uchun tariflar aholiga 15 foizga oshirildi.

Hujjat bilan:

• bazaviy tarif QQSsiz 711 ming 641 soʻm/Gkal;
• aholi uchun QQSsiz 139 ming 860 soʻm/Gkal;
• byudjet tashkilotlariga QQSsiz 952 ming 797 soʻm/Gkal;
• boshqa ulgurji xizmatlar koʻrsatuvchi tashkilotlarga QQSsiz 342 ming 296 soʻm/Gkal miqdorida narx (tarif)lar qoʻllanishi maʼqullangan.

Qarorda aholiga issiqlik taʼminoti xizmatlari boʻyicha pasaytirilgan tariflar qoʻllanilishi oqibatida yuzaga keladigan zararlar va investitsion xarajatlarga asoslantirilgan hisob-kitoblarga muvofiq Toshkent shahar mahalliy byudjeti hisobidan har oyda subsidiyalar ajratish orqali qoplab berilishi qayd etilgan.

Bunda, subsidiya mablagʻlari “Veolia Energy Tashkent” MChJ XK va Toshkent shahar Davlat-xususiy sheriklik boʻlimi tomonidan taqdim qilinadigan hisob-kitoblarga koʻra oʻzgarmas, oʻzgaruvchan xarajatlar hamda investitsion xarajatlarga boʻlingan holda moliyalashtirib berilishi koʻzda tutilgan.

Qaror rasmiy eʼlon qilingan kundan (27-oktyabr) eʼtiboran kuchga kiradi.