Toshkent shahridagi havo sifati bilan bogʻliq vaziyatni yaxshilash maqsadida Prezident Administratsiyasi rahbari Saida Mirziyoyeva raisligida Maxsus komissiya yigʻilishi boʻlib oʻtdi. Unda masʼullar tomonidan amalga oshirilayotgan choralar va qoʻshimcha vazifalar muhokama qilindi.

“Prezidentimiz mendan har kuni bu masala boʻyicha hisobot soʻrayaptilar. Xalqimizning salomatligi bilan bogʻliq masala boʻlgan joyda hech birimizning sustkashlikka yoʻl qoʻyishimizga haqqimiz yoʻq”, — dedi Saida Mirziyoyeva.

Majlisda yirik yashil hududlar barpo etish, bogʻlar tashkil qilish, tabiiy suv havzalari atrofini obodonlashtirish va sunʼiy koʻllar qurish boʻyicha rejalar taqdim etildi. Shuningdek, sanoat zonalari va issiqxonalarda ekologik talablarning bajarilishini qatʼiy nazorat qilish zarurligi qayd etildi.

Tadbirda belgilangan meʼyorlarga rioya qilgan holda faoliyat yuritmoqchi boʻlgan tadbirkorlarni davlat tomonidan qoʻllab-quvvatlash davom ettirilishi, biroq ekologik talablarga amal qilmaydigan har qanday subyektga nisbatan keskin choralar koʻrilishi, bunda hech kimga istisno boʻlmasligi alohida taʼkidlandi.

Saida Mirziyoyeva Fargʻona viloyatida ham ekologik vaziyatni yaxshilash boʻyicha shoshilinch choralar koʻrish yuzasidan masʼullarga topshiriqlar berdi.