Foto: Madaniy meros agentligi

Toshkent viloyatining Parkent tumanida qadimgi davrga oid qabr qoldiqlari topildi. Bu haqda Madaniy meros agentligi matbuot xizmati xabar bermoqda.

Qayd etilishicha, u iyun oyida Kumushkon mahallasidagi fermer xoʻjaligiga olib boruvchi yoʻlning qurilishi jarayonida topilgan. Birlamchi oʻrganishlar natijasida ushbu hududdan suyak boʻlaklari hamda kuchli zanglagan temir qilich ham chiqqan.

Qazishmalar davomida yoʻl ustida yer surish ishlari olib borilayotgan vaqtida hosil boʻlgan oʻra aslida yerosti dafn xonasi (katakomba) ekani aniqlangan. Mutaxassislar tomonidan bu yerdan dafn buyumlari, temir qilich, bronza uzuk, sopol idish hamda bulla (muhr) topilgan.

Qurilishning umumiy turi va dafn marosimining koʻpligidan kelib chiqqan holda mutaxassislarning taxminlaricha, ushbu qabr eramizning I ming yilligiga toʻgʻri kelmoqda. Arxeolog olimlarning soʻzlariga koʻra, bunday qabrlar oʻsha davrdagi koʻchmanchi chorvador aholiga taalluqli boʻlgan boʻlishi mumkin.

Noyob topilmalarni oʻrganish maqsadida eksponatlar Y.Gʻulomov nomidagi Samarqand arxeologiya instituti laboratoriyasiga yuborilgan. Hozirgi vaqtda agentlikning moliyaviy koʻmagida hududda institut xodimlari tomonidan arxeologik qazishma ishlari olib borilmoqda.