Oʻzbekiston Bosh konsulxonasi koʻmagida Tataristonda ogʻir kasallikka chalingan yurtdoshimiz Oʻzbekistonga qaytarildi, deb xabar qilmoqda “Dunyo” axborot agentligi.

Unda aytilishicha, 1968-yilda tugʻilgan X.I. vaqtincha ishlash uchun Tataristonga kelgan. Ish jarayonida sogʻligʻida kuzatilgan jiddiy muammolar tufayli u Tatariston shifoxonasiga yotqizilgan. Bemor Oʻzbekistonga qaytarishlarini soʻrab, mamlakatimizning Qozon shahridagi Bosh konsulxonasiga murojaat qilgan.

Mazkur murojaat asosida Bosh konsulxona xodimlari vatandoshimizni Oʻzbekistonga qaytarishga qaratilgan tibbiy tayyorlov jarayonlarni shifokorlar bilan hamkorlikda muvofiqlashtirib, zarur konsullik-huquqiy va amaliy yordamni qisqa vaqt ichida yakunlagan.

Oʻzbekiston Bosh konsulxonasi, “Uzbekistan airways” milliy aviakompaniyasi vakolatxonasi va Migratsiya agentligi vakili bilan birgalikda X.I.ning “Qozon–Toshkent” aviayoʻnalishi boʻyicha oilasi bagʻriga sogʻ-salomat qaytib kelishini taʼminlagan.

Eslatib oʻtamiz, avvalroq, Oʻzbekiston diplomatlari saʼy-harakatlari bilan Rossiyaning Vladivostok shahrida ogʻir tan jarohati olgan vatandoshimiz ham vatanga qaytarilgan edi.