Sirdaryoda jazo muddatini oʻtayotgan shaxs qalbaki 150 ming dollar bilan qoʻlga olindi. Bu haqda Davlat xavfsizlik xizmati xabar qildi.

Bildirilishicha, Oqoltin tumanida yashovchi, 1998-y.t. fuqaro qalbaki 150 ming AQSH dollarini “shartli xaridor”ga haqiqiy 30 ming AQSH dollariga sotgan vaqtida ashyoviy dalillar bilan ushlangan.

Mazkur fuqaro jinoyat ishlari boʻyicha Yangiyer shahar sudining 2024-yil dekabr oyidagi hukmi bilan Jinoyat Kodeksining 168 va 176-moddalarida nazarda tutilgan jinoyatlarni sodir etganlikda aybdor deb topilib, unga nisbatan 1-yil 10 oy muddatga ozodlikni cheklash jazosi tayinlangan va hozirda jazo oʻtayotgan shaxs hisoblanadi.

Tergovga qadar tekshiruv davomida, u Qozogʻiston Respublikasidan kontrabanda yoʻli bilan keltirilgan ushbu qalbaki kupyuralarni Toshkent viloyatining Chirchiq shahrida yashovchi fuqarodan olganligi maʼlum boʻldi.

Holat yuzasidan Jinoyat Kodeksining 176-moddasi 3-qismi “a” bandi bilan jinoyat ishi qoʻzgʻatilib, qonunbuzarga nisbatan qamoq ehtiyot chorasi qoʻllanildi. Hozirda tergov doirasida uning jinoiy sheriklarini aniqlash boʻyicha zarur chora-tadbirlar amalga oshirilmoqda.