Foto: Samarqand arxeologiya instituti

Samarqand viloyati Urgut tumanida joylashgan Quldortepa yodgorligida ilk oʻrta asrlarga oid devoriy surat va sugʻd tangalari topildi. Bu haqda Samarqand arxeologiya instituti matbuot xizmati xabar berdi.

Qayd etilishicha, eng muhim topilmalardan biri — ibodatxonaning dastlabki qurilish davriga oid devoriy suratlardir. Oq fon ustidan qizil va qora ranglarda ishlangan bu tasvirlarda geometrik naqshli friz bezaklari yaqqol koʻzga tashlanadi.

Shuningdek, ibodatxonadan qator noyob ashyolar ham topilgan. Xususan, uzunligi 4,75 metrli archa ustun, Xitoyning Xan sulolasi davrida ishlab chiqilgan oyna, shuningdek, Sugʻd hukmdori Ukkurt Chamuk tangalari aniqlangan. Ayni paytda Samarqand arxeologiya instituti mutaxassislari topilgan devoriy suratlarni konservatsiya va restavratsiya qilish ishlarini olib bormoqda.

Mazkur yodgorlik qadimgi Xitoy yozma manbalarida Mi yoki Mimoxe, arab-fors manbalarida esa Maymurgʻ nomi bilan tilga olingan va muhim rustoq markaz sifatida qayd etilgan.

Soʻnggi yillarda bu maskanda Oʻzbekiston – Yaponiya hamda Oʻzbekiston – Germaniya olimlari hamkorligida olib borilgan arxeologik tadqiqotlar davomida ilk oʻrta asrlarga oid ibodatxonaning sigʻinish xonasi, ustunli ayvon va yoʻlakli xonalar oʻrni ochib oʻrganildi.

Tadqiqotchilarning taʼkidlashicha, Quldortepa topilmalari ilk oʻrta asrlarda Sugʻdda kechgan diniy jarayonlar, meʼmorchilik va madaniy anʼanalar haqida yangi va muhim maʼlumotlarni taqdim etmoqda.

Maʼlumot uchun, oʻrta asrlarga oid boʻlgan ushbu yodgorlik Vazirlar Mahkamasining 2019-yil 4-oktyabrdagi 846-sonli qarori bilan moddiy madaniy merosning milliy roʻyxatiga kiritilgan va davlat muhofazasiga olingan.