Фото: Самарқанд археология институти

Самарқанд вилояти Ургут туманида жойлашган Қулдортепа ёдгорлигида илк ўрта асрларга оид деворий сурат ва суғд тангалари топилди. Бу ҳақда Самарқанд археология институти матбуот хизмати хабар берди.

Қайд этилишича, энг муҳим топилмалардан бири — ибодатхонанинг дастлабки қурилиш даврига оид деворий суратлардир. Оқ фон устидан қизил ва қора рангларда ишланган бу тасвирларда геометрик нақшли фриз безаклари яққол кўзга ташланади.

Шунингдек, ибодатхонадан қатор ноёб ашёлар ҳам топилган. Хусусан, узунлиги 4,75 метрли арча устун, Хитойнинг Хан сулоласи даврида ишлаб чиқилган ойна, шунингдек, Суғд ҳукмдори Уккурт Чамук тангалари аниқланган. Айни пайтда Самарқанд археология институти мутахассислари топилган деворий суратларни консервация ва реставрация қилиш ишларини олиб бормоқда.

Мазкур ёдгорлик қадимги Хитой ёзма манбаларида Ми ёки Мимохе, араб-форс манбаларида эса Маймурғ номи билан тилга олинган ва муҳим рустоқ марказ сифатида қайд этилган.

Сўнгги йилларда бу масканда Ўзбекистон – Япония ҳамда Ўзбекистон – Германия олимлари ҳамкорлигида олиб борилган археологик тадқиқотлар давомида илк ўрта асрларга оид ибодатхонанинг сиғиниш хонаси, устунли айвон ва йўлакли хоналар ўрни очиб ўрганилди.

Тадқиқотчиларнинг таъкидлашича, Қулдортепа топилмалари илк ўрта асрларда Суғдда кечган диний жараёнлар, меъморчилик ва маданий анъаналар ҳақида янги ва муҳим маълумотларни тақдим этмоқда.

Маълумот учун, ўрта асрларга оид бўлган ушбу ёдгорлик Вазирлар Маҳкамасининг 2019 йил 4 октябрдаги 846-сонли қарори билан моддий маданий мероснинг миллий рўйхатига киритилган ва давлат муҳофазасига олинган.