Videodan kadr

Qashqadaryo viloyati Dehqonobod tumanida joylashgan dizel yonilgʻisini saqlash omborida yirik yongʻin sodir boʻldi. Viloyat Favqulodda vaziyatlar boshqarmasi hodisa yuzasidan maʼlumot berdi.

Bildirilishicha, bugun, 29-sentyabr kuni soat 09:43 da Dehqonobod tumani “Oʻzbekiston” MFY “Yetimquduq” qishlogʻida yer ustiga oʻrnatilgan dizel yoqilgʻi saqlash sigʻimida yongʻin roʻy bergani toʻgʻrisida viloyat FVBga xabar tushgan.

Shunga koʻra, 3 ta yongʻin-qutqaruv ekipaji soat 09:58 da hodisa joyiga yetib borib, 10:05 da alangani qurshab olgan va 10:30 da toʻliq bartaraf qilgan.

Voqea joyiga viloyat FVB boshligʻi va tuman FVB rahbar xodimlari IIB, SSB, prokuratura masʼul xodimlari yetib borgan. Hozirda mazkur holat yuzasidan dastlabki tergov oldi surishtiruv ishlari olib borilmoqda.

“Oʻzbekneftgaz” matbuot kotibi Moʻmin Ibodovning maʼlum qilishicha, yongʻin “Maqsad Petroleum” xususiy korxonasi tomonidan ijaraga olingan dizel yonilgʻisini saqlash omborida yuz bergan.

Unga koʻra, korxona Oʻzbekistonda barcha turdagi seysmogeologiya ishlari bilan shugʻullanadi. Ushbu korxona va ombor “Oʻzbekneftgaz” AJ tasarrufiga kirmaydi, biroq yaqindan hamkorlik qilib keladi.