“Uzbekistan Airports” AJ Oʻzbekiston Transport vazirligi tashabbusi bilan “Silk Avia” mintaqaviy shuba aviakompaniyasini tashkil etmoqda. Yangi aviatashuvchi parvozlarni kelgusi yildan boshlashni rejalashtirmoqda.

«Silk Avia» aviakompaniyasi Dubay shahrida 14 — 18-noyabr kunlari boʻlib oʻtgan “Dubay Airports-2021” xalqaro aviasalon doirasida joriy yilning sentabr oyida roʻyxatdan oʻtgan. Unda “Uzbekistan Airports” hamda “HAS Aviation GT LLC” kompaniyasi mintaqaviy aviakompaniya tashkil etish Strategiyasini ishlab chiqish boʻyicha shartnoma imzolagan.

Mintaqaviy aviakompaniyaning tashkil etilishi Oʻzbekistonda ishbilarmonlik faolligini ragʻbatlantirish va ichki turizmni rivojlantirish yoʻlidagi shart-sharoitlarni yaratish uchun muhim ahamiyatga ega boʻlib, bu oʻz navbatida aholining aviatsiya harakatchanligi koeffitsiyentining ortishiga taʼsir qiladi.

«Biz bozorda oʻzbekistonliklar uchun arzon narxlarda ichki aviatashuvlarni taʼminlaydigan aviakompaniya tashkil etishni maqsad qilib qoʻydik. Yaqin vaqtgacha Oʻzbekiston shaharlarini bogʻlaydigan toʻgʻridan-toʻgʻri qatnovlarning yoʻqligi katta muammo edi. Samarqanddan Xorazmga borish uchun yoʻlovchilar Toshkent orqali uchishlari kerak edi. Bizning vazifamiz — ichki tashuvlarni nafaqat «point to hub» (poytaxtdan hududlarga), balki “point to point” (mintaqalar orasida) modeli asosida ham tashkil etishdir. 40 ga yaqin yoʻnalishlar va 70 kishiga qadar yoʻlovchi tashish quvvatiga ega mintaqaviy samolyotlarni sotib olish rejalashtirilgan. Tariflar temir yoʻl tariflariga muvofiqlashtiriladi. Bu ichki turizmni rivojlantirishga va isteʼmolchi uchun aviachiptalarning yakuniy qiymatiga ijobiy taʼsir koʻrsatadi», — deydi “Uzbekistan Airports” AJ Boshqaruvi raisi Raʼno Joʻrayeva.

Yangi aviakompaniya mintaqaviy aeroportlarni rivojlantirish uchun ham zarur. Shu bois, uni birinchi bosqichda “Uzbekistan Airports” boshqaruv kompaniyasi yaratmoqda. Kelgusida aviakompaniya xususiy sektorga oʻtkazilishi rejalashtirilgan. Taʼkidlash joizki, “Silk Avia” oʻzini “Uzbekistan Airways” milliy aviatashuvchisining raqibi sifatida namoyon qilmaydi, balki ichki tashuvlarni tashkil etish boʻyicha hamkor sifatida faoliyat yuritadi.