Foto: Madaniyat vazirligi

Madaniyat vazirligi xonandalarga mamlakat shaʼnini eʼzozlash, odob-axloq, madaniyat, oʻzbekona qadriyatlarni unutmaslik kabi muhim masalalar yuzasidan tushuntirish berdi. Bu haqda vazirlik matbuot xizmati xabar berdi.

Qayd etilishicha, Madaniyat vazirligida xonandalar ishtirokida konsert-tomosha faoliyatida olib borilayotgan madaniy-maʼrifiy ishlar hamda “Sanʼatkor odobi” mavzusida yigʻilish boʻlib oʻtgan.

Yigʻilish kun tartibidan mamlakatimizda ijod qilayotgan sanʼatkorlarning maʼnaviy-madaniy faoliyati hamda “Sanʼatkor odob-axloqi”, Oʻzbekiston Respublikasida fuqarolarning vijdon erkinligini taʼminlash va diniy sohadagi davlat siyosati konsepsiyasini tasdiqlash toʻgʻrisida»gi qonunning mazmun-mohiyati, sanʼatkorlarning konsert-tomosha faoliyati uchun litsenziya talab va shartlari hamda mualliflik huquqi kabi masalalar oʻrin olgan.

Yigʻilish avvalida Prezidentning 2024-yil 14-noyabrdagi “Tadbirkorlar huquqlari va qonuniy manfaatlarini ishonchli himoya qilish chora-tadbirlari toʻgʻrisida”gi 184-farmonining mazmun-mohiyati tushuntirildi. Konsert-tomosha faoliyatini amalga oshirish sohasiga oid majburiy talablardan xabardorligini oshirish boʻyicha farmon bilan tasdiqlangan nizomning tartib-taomili boʻyicha konsert tashkilotchilari va sanʼatkorlarga tushuntirish berilgan.

Yigʻilish davomida “Litsenziyalash, ruxsat berish va xabardor qilish tartib-taomillari toʻgʻrisida”gi qonunga asosan “Oʻzbekkonsert” davlat muassasasi tomonidan konsert-tomosha faoliyatini amalga oshirishda sanʼatkorlarning majburiy talablarga rioya qilishini hamda asosiy litsenziya talablarida ijrochilarning “konsert-tomosha sohasida u yoki bu dinni targʻib qilmaslik” masalalari ham muhokama qilingan.

Shuningdek, yigʻilishda Konstitutsiya qonunlari va boshqa qonunchilik hujjatlariga soʻzsiz rioya etishi, boshqa davlatlarda boʻlganida oʻz mamlakat shaʼnini eʼzozlashi odob-axloq, madaniyat, oʻzbekona qadriyatlarni unutmaslik haqida soʻz borgan.

Vazirning birinchi oʻrinbosari Bahodir Ahmedov milliy urf-odatlar, qadriyatlar va anʼanalarga hurmat bilan munosabatda boʻlish, dabdababozlik, shohona hayotni koʻz-koʻz qilmaslik va boshqa salbiy illatlarga yoʻl qoʻymaslik, jamoat joylarida, atrofdagilar eʼtiborini tortuvchi ortiqcha salbiy harakatlarga yoʻl qoʻymaslik haqida taʼkidlab oʻtgan.

Shu bilan birga kuy-qoʻshiqlarning mazmuniga eʼtibor qaratish, mualliflik huquqlarining buzilish holatlariga ham toʻxtalib oʻtdi. Shuningdek, oʻz ijodlari davomida vatanga muhabbat, sadoqat, vatanparvarlik ruhidagi qoʻshiqlarni koʻpaytirish, oʻsib kelayotgan yosh avlodga namuna boʻlishlari aytib oʻtilgan.