Qozogʻistonning Olmaota shahrida “Oʻzbekneftgaz” AJ va “KazMunayGaz” AJ oʻrtasida neft-gaz sohasida hamkorlik toʻgʻrisidagi bitim imzolandi. Bu haqida “OʻzA” xabar berdi.

Unga koʻra, neft-gaz sohasida hamkorlik toʻgʻrisidagi bitim ikki davlat kompaniyalari oʻrtasida uzoq muddatli sheriklikni rivojlantirishga xizmat qiladi. Mazkur hujjatda ekspertlar muloqotini yoʻlga qoʻyish, tajriba almashish va strategik tashabbuslarni birgalikda ishlab chiqish nazarda tutilgan.

“Bitim doirasida loyihalar geografiyasini kengaytirish, resurs bazasidan samarali foydalanish va ishlab chiqarish hamda transport infratuzilmasidan foydalanish imkoniyatlarini oshirish rejalashtirilgan”, — deyiladi xabarda.

Shuningdek, ekspertlar kompetensiyasini birlashtirish orqali amaliy yechimlar va tashabbuslar ishlab chiqiladi. Bu esa har ikki tomonning barqaror rivojlanishiga hissa qoʻshadi.

Jamiyat axborot xizmatining maʼlum qilishicha, mazkur qadam Oʻzbekiston va Qozogʻiston oʻrtasidagi ishonchli hamkorlikni yanada mustahkamlab, Markaziy Osiyoda energetika sohasidagi sheriklikni kengaytirishga turtki beradi.