Rasmiy tashrif mobaynida Oʻzbekiston parlament delegatsiyasi Vengriyaning yetakchi farmatsevtika kompaniyalaridan biri – “Gedeon Richter” korxonasiga tashrif buyurib, uning ishlab chiqarish jarayonlari, ilmiy-tadqiqot ishlari va kelgusi rivojlanish strategiyasi bilan yaqindan tanishdi.

“Gedeon Richter” kompaniyasi 8 ta ilova tarkibiy boʻlinmaga ega boʻlib, ulardan 5 tasi Vengriyada, 2 tasi Rossiyada va 1 tasi Germaniyada joylashgan. Korxonada 11 mingdan ortiq xodimlar faoliyat yuritadi. Kompaniya jahon bozoriga 2,8 ming nomdagi dorivor vositalarini yetkazib berib, xalqaro farmatsevtika sohasida muhim oʻrin egallaydi.

Kompaniya mahsulotlarining MDH davlatlaridagi sotilishi hajmida Oʻzbekiston ikkinchi oʻrinni egallaydi. Mamlakatimizda kompaniyaning yillik mahsulot savdo aylanmasi 10 mln AQSH dollaridan ziyoddir.

Uchrashuv chogʻida hamkorlikni yanada rivojlantirish masalalari muhokama qilindi. Farmatsevtika sohasida qoʻshma ishlab chiqarish, texnologiyalar transferi va innovatsion mahsulotlar yaratish boʻyicha hamkorlikni kengaytirish istiqbollari ham eʼtibor qaratildi.

“Gedeon Richter” kompaniyasining mintaqaviy direktori Oroz Andrash Oʻzbekistonda nevrologiya yoʻnalishida qoʻllaniladigan yuqori samarali “Kariprazin” preparatining kontrakt asosida mahalliy ishlab chiqarishini yoʻlga qoʻyish borasida katta qiziqish bildirdi. Mazkur dori vositasi AQSH bozorida kompaniyaning sotilishi darajasi eng yuqori boʻlgan mahsulotlaridan biri hisoblanadi.

Shuningdek, u loyiha boʻyicha texnik va tijorat tavsiflarini muhokama qilish maqsadida Oʻzbekistondagi hamkorlar bilan yaqin kunlarda uchrashuv oʻtkazishga tayyorligini bildirdi.