Malayziyada oʻtkazilgan uchrashuvda Oʻzbekistonning Janubi-Sharqiy Osiyo davlatlari assotsiatsiyasi (ASEAN)ning Janubi–Sharqiy Osiyoda doʻstlik va hamkorlik shartnomasiga qoʻshilish boʻyicha arizasi maʼqullandi. Bu haqda “Dunyo“ axborot agentligi xabar berdi.

Oʻzbekistonning ASEANning Janubi–Sharqiy Osiyoda doʻstlik va hamkorlik shartnomasiga qoʻshilish tashabbusi Prezident Shavkat Mirziyoyev tomonidan ilgari surilgan edi.

Qariyb bir yillik tayyorgarlik jarayonlari va muzokaralardan soʻng, Kuala Lumpur shahrida Malayziya raisligida boʻlib oʻtgan ASEAN Tashqi ishlar vazirlarining yigʻilishida tashkilotga aʼzo barcha davlatlar Oʻzbekistonning ushbu shartnomaga qoʻshilish boʻyicha arizasini maʼqullagan.

Janubi-Sharqiy Osiyoda doʻstlik va hamkorlik shartnomasi 1976-yil 24-fevralida Indoneziyaning Bali shahrida imzolangan boʻlib, ASEAN mintaqasidagi oʻzaro hamkorlikning asosiy tamoyillarini belgilab beruvchi muhim hujjat, deb tan olinadi.

Oʻz navbatida, ASEAN mintaqasi Janubi-Sharqiy Osiyoning 11 davlatini oʻz ichiga olgan va 700 million nafarga yaqin aholiga ega boʻlgan yirik bozor hisoblanadi.

Oʻzbekistonning mazkur shartnomaga qoʻshilishi mamlakatimiz uchun ushbu mintaqada yangi imkoniyatlarni ochadi. Bunda, nafaqat davlat va davlat oʻrtasidagi G2G hamkorlik, balki savdo-iqtisodiy va investitsiyaviy aloqalarning yanada faollashishiga, yirik xorijiy korxonalarning ishonchi ortishiga xizmat qiladi.