Poytaxtimizda oʻtkazilgan birinchi Toshkent xalqaro investitsiya forumining Oʻzbekistonda oʻtkazilishi mamlakatimiz taraqqiyoti va istiqboli uchun juda ham foydalidir.

Binobarin, mamlakatimizni rivojlantirish boʻyicha galdagi qadamlar, sanoatni yuqori qoʻshilgan qiymatli mahsulot ishlab chiqarishga yoʻnaltirish, milliy energetika tarmogʻini transformatsiya qilish va muqobil energiya manbalariga oʻtish choralari, mintaqa mamlakatlarining transport jihatidan bogʻliqligini mustahkamlash va tranzit salohiyatini oshirish masalalari ham forum qatnashchilarining diqqat markazida boʻldi.

Prezidentimiz forumda nutq soʻzlar ekan, 2017-yilda xorijiy valyutani konvertatsiya qilish, xorijiy investorlar tomonidan foydani repatriatsiya qilish boʻyicha cheklovlar bekor qilinganini, bank va yirik korxonalarimiz ilk marta xalqaro reytinglar olib, jahon moliya bozorlariga chiqqanini, Xalqaro hamjamiyat uchun ochiqlik siyosatini taʼminlash uchun 90 ta xorijiy davlat fuqarolari uchun Oʻzbekistonga vizasiz kirish imkoniyati yaratilganini va yana 60 ga yaqin mamlakat fuqarolariga esa yengillashtirilgan tartibda viza olish imkoniyati berilishini aytib oʻtdi.

Eng quvonarlisi, bu koʻrsatkichlar boʻyicha mamlakatimiz mintaqadagi eng ochiq davlat maqomiga ega boʻldi.

Birinchi Toshkent xalqaro investitsiya forumi bu mamlakatimizning barcha sohalar boʻyicha xorijiy hamkor tashkilotlar bilan aloqalarimizni yanada mustahkamlash bilan birga jonajon Oʻzbekistonimizni kelgusida yanada taraqqiy etgan davlatlar safiga qoʻshilishida muhim ahamiyat kasb etadi.

Hazratqul XOʻJAMQULOV,

Oliy Majlis Qonunchilik palatasi deputati.