Oliy Majlisning Inson huquqlari boʻyicha vakilining (ombudsmanning) “Ishonch telefoni”ga Toshkent viloyatidagi 43-sonli manzil-koloniyada jazo muddatini oʻtayotgan 28 va 50-sonli manzil-koloniyada jazo muddatini oʻtayotgan 25 hamda Samarqand viloyatidagi 38-sonli manzil-koloniyada jazo muddatini oʻtayotgan 8 nafar mahkumning murojaatlari kelib tushgan edi.

Oliy Majlisning Inson huquqlari boʻyicha vakili (ombudsman) Axborot xizmati xabariga koʻra, ushbu murojaatlarda, mahkumlar ozodlikdan mahrum qilish tariqasidagi jazoning belgilangan qismi oʻtalgan boʻlishiga qaramay, ularga nisbatan insonparvarlik dalolatnomasi qoʻllanilmayotgani bayon qilingan.

Murojaatlar Ombudsman tomonidan oʻrganilib, Ichki ishlar vazirligi va Oliy sudga ushbu holatni bartaraf etish yuzasidan soʻrov xati kiritilib, ijrosi nazoratga olingan. Natijada Jinoyat ishlari boʻyicha tegishli sudlarning ajrimi bilan 48 nafar mahkumga tayinlangan ozodlikdan mahrum qilish tariqasidagi jazo axloq tuzatish ishlariga, 3 nafar mahkumga tayinlangan ozodlikdan mahrum qilish jazosi shartli ravishda ozod etishga va 2 nafar mahkumga tayinlangan ozodlikdan mahrum qilish jazosi ozodlikni cheklash jazosiga almashtirilgan. Qolgan 8 nafar mahkumning intizomiy jazosi mavjud boʻlganligi sababli insonparvarlik dalolatnomasi qoʻllanilishi rad etilgan.