Foto: Majburiy ijro byurosi matbuot xizmati

Nukus shahrida yashayotgan fuqaro farzandi uchun 13 yillik alimentni oldindan toʻlab, rekord oʻrnatdi. Bu haqda Majburiy ijro byurosi (MIB) matbuot xizmati xabar berdi.

Maʼlum qilinishicha, qarzdor A.B. Nukus shahri MIB boʻlimiga kelib, farzandi uchun alimentlarni oldindan toʻlash istagini bildirgan.

“Shunda davlat ijrosi tomonidan qarzdorga Oʻzbekiston Respublikasi Vazirlar Mahkamasining 808-sonli qaroriga muvofiq farzandi voyaga yetguniga qadar toʻlanishi lozim boʻlgan aliment pullarini oldindan toʻlashi mumkinligi tushuntirilgan va kelgusi 13 (un uch) yil davomida toʻlashi lozim boʻlgan aliment pullari hisoblab chiqilgan boʻlib, u 2 milliard 270 million 812 ming soʻmni tashkil etgan”, — deyiladi xabarda.

Fuqaroning sobiq turmush oʻrtogʻi ushbu summa — 2 mlrd soʻmdan ortiq alimentni olganini tasdiqlagan.

MIB maʼlumotiga koʻra, bu — hozirgacha aliment toʻlash boʻyicha qayd etilgan eng yirik summa hisoblanadi.

Eslatib oʻtamiz, shu yilning aprel oyida Toshkentdagi erkak ham farzandi uchun 1,8 mlrd soʻm aliment toʻlab, shunga oʻxshash rekordni qayd etgan edi.