Kuchli taʼsir qiluvchi vositalar savdosi bilan shugʻullanib kelgan shaxs ushlandi. Bu haqida Iqtisodiy jinoyatlarga qarshi kurashish departamenti xabar berdi.

Bildirilishicha, departamentning Navoiy viloyati boshqarmasi va boshqa huquqni muhofaza qiluvchi organ xodimlari hamkorligida oʻtkazilgan tezkor tadbir davomida fuqaro Ch.U. tarkibida kuchli taʼsir qiluvchi moddalari mavjud boʻlgan 19 quti va 100 kapsuladagi vositalarni fuqaro S.S.ga 4 million soʻmga sotgan vaqtida ushlangan.

Shundan soʻng, tezkor tadbir davom ettirilib, ushbu shaxsdan yana 13 quti va 100 kapsula kuchli taʼsir qiluvchi vositalari ashyoviy dalil sifatida rasmiylashtirib olingan.

Hozirda mazkur holat yuzasidan Jinoyat kodeksining 251-1-moddasi (giyohvandlik vositalari, ularning analoglari yoki psixotrop moddalar hisoblanmaydigan kuchli taʼsir qiluvchi moddalarni targʻib qiluvchi mahsulotni tayyorlash, tarqatish, reklama qilish, namoyish etish yoki bunday moddalarni yoxud zaharli moddalarni qonunga xilof ravishda muomalaga kiritish) bilan jinoyat ishi qoʻzgʻatilib, tergov harakatlari boshlab yuborilgan.