Namangan davlat texnika universitetiga yangi rektor tayinlandi. Bu haqida Oliy taʼlim, fan va innovatsiyalar vazirligi xabar berdi.

Vazirlar Mahkamasining tegishli qarori bilan Oybek Karimovich Ergashev Namangan davlat texnika universiteti rektori etib tayinlandi.

Oybek Ergashev tayinlovga qadar Namangan muhandislik-texnologiya instituti ilmiy ishlar va innovatsiyalar boʻyicha prorektori sifatida faoliyat yuritgan.

Maʼlumot oʻrnida, Oybek Karimovich Ergashev 1982-yil 7-yanvar kuni Namangan tumanida tavallud topgan. Maʼlumoti oliy, 2003-yili Namangan muhandislik-pedagogika institutining bakalavriat, 2006-yili magistratura yoʻnalishini tamomlagan. Mutaxassisligi muhandis-texnolog-pedagog.

Oybek Ergashev mehnat faoliyatini 2003-yilda Namangan muhandislik-pedagogika institutida kimyoviy texnologiya kafedrasi laboratoriya mudiri sifatida boshlagan. U mehnat faoliyati davomida Namangan muhandislik-pedagogika instituti, Oʻzbekiston Fanlar akademiyasi umumiy va noorganik kimyo instituti, Namangan muhandislik-texnologiya institutida turli masʼul vazifalarda samarali ish olib borgan. Institutning kimyo-texnologiya fakulteti dekani, oʻquv ishlari boʻyicha prorektor lavozimlarida ham faoliyat yuritgan.