Illyustrativ foto

Zamonaviy mashinalardagi oʻrindiq isitish tizimi erkaklar salomatligiga salbiy taʼsir koʻrsatishi mumkin. Bu haqda rossiyalik shifokor, tibbiyot fanlari nomzodi Andrey Kondraxin RIA Novosti agentligiga maʼlum qildi.

Mutaxassisning soʻzlariga koʻra, bu funksiya qulay boʻlsada, ayrim hollarda xavf tugʻdirishi mumkin. Uning taʼkidlashicha, erkaklar uchun bu opsiya tavsiya etilmaydi, chunki tuxumdonlar organizm tashqarisida joylashgan va ularni ortiqcha qizdirish sperma sifati hamda spermatogenez jarayonini buzishi ehtimoli bor.

Shuningdek, oʻrindiq isitishning asosiy maqsadi bel va kichik chanoq sohasini qisqa vaqtda isitishdir. Bu shamollashning oldini olishga yordam berishi mumkin, ammo uzoq foydalanish ortiqcha qizishga olib keladi.

Shifokorning qoʻshimcha qilishicha, bunday isitish gemorroy, buyrak yoki prostata bezi kasalliklari bilan bogʻliq muammolarni kuchaytirishi ehtimoli yuqori.

“Qon aylanishi kuchayganda gemorroy uzellari shishadi, infeksiyalar esa issiq muhitda faollashadi. Bu piyelonefrit yoki boshqa buyrak kasalliklari holatini ogʻirlashtirishi mumkin”, dedi u.

Mutaxassisning tavsiyasiga koʻra, oʻrindiq isitishdan meʼyorda foydalanish kerak — tanani qisqa vaqtda isitib olib, keyin qurilmani oʻchirish lozim.