Fransiyada Luvr muzeyi talonchiligi bilan bogʻliq jinoyat ishi doirasida yana besh nafar gumonlanuvchi hibsga olindi, deb xabar berdi RTL radiostansiyasi.

“Sud manbalariga koʻra, Luvr talonchiligi boʻyicha tergov doirasida besh nafar yangi gumonlanuvchi hibsga olindi”, — deyiladi xabarda.

Hibsga olingan shaxslar Parijning turli joylarida bir vaqtning oʻzida qoʻlga olingan, biroq oʻgʻirlangan qimmatbaho buyumlar topilmagan.

Eslatib oʻtamiz, Luvr 19-oktyabr kuni talon-taroj qilingan edi. Jinoyatchilar Apollon galereyasiga kirib, bir necha daqiqada toʻqqizta tarixiy zargarlik buyumini olib chiqib ketgan. Dastlabki baholashlarga koʻra, oʻgʻirlangan buyumlarning umumiy qiymati 88 million yevroni tashkil etadi.

Yoʻqolgan buyumlar orasida imperator Napoleonning rafiqasi Mariya-Luizaning marvaridli taqinchoqlari, shuningdek, qirolicha Mariya-Amaliya, Niderlandiya qirolichasi Gortenziya de Bogarne va Yevgeniya kolleksiyalariga mansub zargarlik asarlari bor.

Bir hafta oʻtib, ikki gumonlanuvchi hibsga olingan edi: ulardan biri Sharl-de-Goll aeroportida Jazoirga uchmoqchi boʻlgan paytda, ikkinchisi esa Parij chekkasida ushlangan.