Foto: www.google.com

Bugun, 15-mart kuni Oʻzbekistonda koronavirus aniqlanishi ortidan Vazirlar Mahkamasida boʻlib oʻtgan yigʻilishda bemor haqida qoʻshimcha maʼlumot berildi.

Maʼlum boʻlishicha, bemor – oliy toifali shifokor, Toshkentdagi xususiy klinikalardan birining rahbari.

Ayol 11-mart kuni “Parij-Toshkent” reysi orqali uchib kelgan. Aeroportda oʻtkazilgan birlamchi tekshiruvda bemorda kasallikning hech qanday alomati aniqlanmagan.

Keyinchalik, dastlabki simptomlar paydo boʻlgach, bemorning oʻzi 14-mart oqshomida Virusologiya instituti laboratoriyasiga murojaat qilib, qon tahlillari topshirgan. Shundan soʻng zudlik bilan karantinga olingan. Bemorning yoshi oshkor qilinmadi.

Ayni paytda reys yoʻlovchilari, bemorning oila aʼzolari, hamkasblari, u bilan kontaktda boʻlganlar – 150ga yaqin kishi izolyatsiyaga olingan. Ular bilan aloqada boʻlganlarni ham aniqlash ishlari davom etyapti.

11-mart tongida Fransiyadan uchib kelgan samolyotda 45 nafar yoʻlovchi boʻlgan, ularning yarmi – chet el fuqarolari. Xorijliklar tranzit tufayli Oʻzbekistonda boʻlib, soʻng mamlakatni tark etgan.

Oʻzida koronavirus alomatlarini sezgan fuqarolardan shifoxonaga bormaslik, 103 raqamiga qoʻngʻiroq qilgan holda tez tibbiy yordam chaqirish soʻralmoqda.