Isroil zarurat tugʻilgan taqdirda Eron hududiga bir tomonlama tarzda zarba berishi mumkinligi haqida AQSHni ogohlantirdi. Bu haqda The Jerusalem Post xabar berdi.

Maʼlum qilinishicha, oʻtgan hafta Isroil Mudofaa vazirligi vakillari ushbu pozitsiyani Pentagon rasmiylariga yetkazgan. Vashingtonga Eronning ballistik raketa dasturi bilan bogʻliq muayyan shartlar yuzaga kelgan taqdirda Isroil amalga oshirishi mumkin boʻlgan zarba rejalari taqdim etilgan.

“Biz amerikaliklarga shunday dedik: agar Eron ballistik raketalar masalasida belgilab qoʻygan “qizil chizigʻimiz”ni kesib oʻtsa, zarbani yolgʻiz oʻzimiz beramiz”, — dedi ismi oshkor etilmagan manba.

Ayni paytda Isroil tomoni oʻz tomonidan darhol zarba berish uchun shart-sharoitlarni koʻrmayapti, ammo vaziyatni doimiy ravishda monitoring qilishni davom ettirmoqda.

Shu bilan birga, Isroil hukumat doiralarida shunday xavotir borki, hatto AQSH Eronga nisbatan zarba berishga qaror qilgan taqdirda ham, bu zarbalar cheklangan va ramziy xarakterga ega boʻlishi mumkin. Bu esa yahudiy davlati amaldagi hukumatining pozitsiyasiga mos kelmasligi taʼkidlanmoqda.