Mashhur milliarder va tadbirkor Ilon Mask AQSH prezidenti Donald Tramp maʼmuriyatidagi faoliyatini yakunladi. U “X” ijtimoiy tarmogʻidagi bayonotida:

“Maxsus davlat xodimi sifatida mening muddatim tugaydi. Samarasiz xarajatlarga qarshi kurashish imkoniyati uchun prezidentdan minnatdorman. Samaradorlik departamentining missiyasi vaqt oʻtishi bilan yanada mustahkamlanadi, chunki u butun hukumatning turmush tarziga aylanadi”, — deb yozdi Mask.

Uning davlat xizmatidagi ishtiroki hukumat xarajatlarini optimallashtirish va samaradorlikni oshirish maqsadida tashkil etilgan “Samaradorlik departamenti” bilan bogʻliq edi.

Mask oʻz lavozimidan ketishi oldidan, CBC telekanaliga bergan intervyusida Donald Tramp tomonidan ilgari surilgan yangi byudjet va soliq qonun loyihasini tanqid qildi. Unga koʻra, taklif etilgan chora-tadbirlar byudjet taqchilligini oshiradi hamda hukumat samaradorligini taʼminlash yoʻlidagi saʼy-harakatlarga zid keladi.

Shu bilan Ilon Maskning Tramp maʼmuriyati bilan rasmiy hamkorligi yakunlandi, ammo u davlat boshqaruvi va siyosiy jarayonlar yuzasidan oʻz fikrlarini bildirishda davom etmoqda.