Bugun Guliston davlat universiteti markaziy stadionida yoshlarning sogʻlom turmush tarziga qiziqishini oshirish, talabalar oʻrtasida sport muhitini mustahkamlash maqsadida tashkil etilgan “Besh tashabbus olimpiadasi” ommaviy sport musobaqalarining respublika final bosqichi boshlandi. Musobaqada 700 nafardan ortiq iqtidorli va faol talaba-yoshlar ishtirok etmoqda.

Respublika finali ochilish marosimida Sirdaryo viloyati hokimi vazifasini bajaruvchi Erkinjon Turdimov, oliy taʼlim, fan va innovatsiyalar vaziri Qoʻngʻirotboy Sharipov, sport vaziri Adham Ikramov va Guliston davlat universiteti rektori Muhsin Hojiyev ishtirok etdi. Tadbirda mamlakat rahbari tomonidan yoshlarning tarbiyasi, ularda vatanparvarlik, jismoniy barkamollik va faol hayotiy pozitsiyani shakllantirishning ustuvor ahamiyatga ega ekani taʼkidlandi.

— “Besh tashabbus” olimpiadasi nafaqat oliy taʼlim muassasalarida, balki keng jamoatchilik orasida ham sogʻlom turmush tarziga boʻlgan munosabatni kuchaytirmoqda — deydi Guliston davlat universiteti yoshlar yetakchisi Yorqinjon Hayitboyev. — Shu maʼnoda aytish mumkinki, Gulistonda start olgan “Besh tashabbus” olimpiadasining respublika final bosqichi ham yoshlarni sportga keng jalb etish, ularning ijtimoiy faolligi va jismoniy tayyorgarligini oshirish, vatanparvar va har tomonlama barkamol avlodni shakllantirishda muhim qadam boʻlib xizmat qiladi.

Ahmadali ShERNAZAROV, “Xalq soʻzi”.