Fransiya Milliy Assambleyasida oʻtkazilgan ovoz berishda koʻpchilik deputatlar hukumatga ishonch bildirmadi. Bu esa bosh vazir Fransua Bayruning isteʼfoga chiqishiga olib keladi. Bu haqda TASS xabar berdi.

Maʼlumotlarga koʻra, 573 deputatdan 558 nafari ovoz bergan. Ulardan 194 nafari hukumatga ishonch bildirgan boʻlsa, 364 nafari qarshi ovoz berdi. Milliy Assambleya Bayru taqdim etgan siyosat bayonotini maʼqullamadi. “Bosh vazir hukumatning isteʼfoga chiqishi haqida prezidentga murojaat taqdim etishi shart”, — dedi parlament quyi palatasi raisi Yael Bron-Pive.

Tinglovlar vaqtida Bayru mamlakat iqtisodiyotidagi inqirozli holatga, ayniqsa davlat qarzining keskin oʻsishiga urgʻu berdi. U shuningdek, 2026-yilgacha davlat xarajatlarini deyarli 44 milliard yevroga qisqartirishni koʻzda tutgan rejani himoya qildi. Rejaga koʻra, pensiyalar va ayrim ijtimoiy toʻlovlarni oshirishdan voz kechish orqali davlat qarzining oʻsishini cheklash rejalashtirilgan edi.

Oppozitsiya vakillari esa bosh vazirni qattiq tanqid qilib, bu holatga ketma-ket hukumatlar va prezident Emmanuel Makronning siyosati sababchi ekanini taʼkidlashdi.

Maʼlum qilinishicha, Makron yaqin kunlarda yangi bosh vazirni tayinlash imkoniyatini koʻrib chiqadi.