Bosh prokuratura huzuridagi Departamentning Surxondaryo viloyati boʻlimi kadastr hujjatlarini rasmiylashtirib berishni vaʼda qilib, fuqarolarni chuv tushirgan muhandis va soxta kadastr xodimini aniqladi. Bu haqda Departamentning matbuot xizmati xabar qilgan.

Maʼlum boʻlishicha, Kadastrlar palatasi Denov tumani filiali muhandisi Oʻ.N. fuqaro A.N.ning ishonchiga kirib, uning akasiga tegishli uy-joyning kadastr hujjatlarini 2 ming AQSH dollari evaziga rasmiylashtirib berishini aytib, 1 ming 800 AQSH dollari va 2,5 mln soʻmni olgan vaqtida ashyoviy dalillar bilan ushlangan.

Shu kabi yana bir holat Qumqoʻrgʻon tumanida aniqlangan. Qayd etilishicha, oʻzini goʻyoki Qumqoʻrgʻon tumani kadastr boʻlimi xodimi sifatida tanishtirgan fuqaro F.B. fuqaro X.P.ning ishonchiga kirib, uning Qumqoʻrgʻon tumani “Mexrabod” mahallasida joylashgan uy-joying kadastr hujjatlarini rasmiylashtirib berishi evaziga 11 million soʻm talab qilgan. U kelishilgan pulni olayotgan vaqtida ashyoviy dalillar bilan ushlangan.

“Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qoʻzgʻatilib, tergov harakatlari oʻtkazilmoqda”, deyiladi xabarda.

Avvalroq, sobiq “elektroset” muhandisi tadbirkorni 7 ming AQSH dollariga chuv tushirmoqchi boʻlgani haqida xabar berilgandi.