Filippinda yoʻlovchilarni tashiyotgan parom choʻkib ketdi. Kema bortida boʻlgan 350 dan ortiq odamning yuz nafardan ortigʻi bedarak yoʻqolgan, deb xabar bermoqda CNN nashri.

Rasmiy maʼlumotlarga koʻra, sohil qoʻriqlash xizmati tomonidan suvdan kamida 215 nafar tirik qolganlar qutqarib olingan, shuningdek, 15 nafar halok boʻlganlarning jasadlari topilgan. Qidiruv-qutqaruv ishlari hanuz davom etmoqda.

Parom halokatining aniq sabablari hozircha maʼlum emas. Tegishli idoralar tomonidan hodisa yuzasidan tekshiruv ishlari olib borilmoqda. Qayd etilishicha, fojia sodir boʻlgan kuni ob-havo qulay boʻlgan. Kemada meʼyordan ortiq yuklanish kuzatilmagan. Mutaxassislar halokat texnik nosozliklar oqibatida roʻy bergan boʻlishi mumkinligini aytmoqda.

Soʻnggi maʼlumotlarga koʻra, halokatga uchragan “Trisha Kerstin 3” paromi hududdagi orollar oʻrtasida doimiy qatnovchi boʻlib, shu kuni Zamboanga port shahridan Sulu provinsiyasida joylashgan Janubiy Xolo oroli sari ketayotgan boʻlgan. Parom bortida 332 nafar yoʻlovchi va 27 nafar ekipaj aʼzosi boʻlgani haqida maʼlumotlar bor.