“Dehcha” mahallasida joylashgan 39-son davlat maktabgacha taʼlim tashkiloti salkam ellik yil muqaddam oʻz faoliyatini boshlagan edi. Oʻshanda bogʻchaga ilk bor qadam qoʻygan bolalar ulgʻayib, bugungi kunda 54-55 yoshni qoralab qoʻydi. Ammo bogʻcha binosi oʻsha-oʻshaligicha qoldi. Aniqrogʻi, taʼmirtalab ahvolga tushdi.

Buxoro tumanidagi mazkur muassasa uchun yangi binoning qurilishi shu boisdan ham dehchaliklar uchun quvonchli voqeaga aylandi. Axir, oʻz farzandining zamon talablari darajasidagi maskanda taʼlim-tarbiya olishini qaysi ota-ona istamaydi, deysiz?

— Yangi bino investitsiya dasturi doirasida 3,5 milliard soʻm miqdoridagi mablagʻ evaziga barpo etildi, — deydi mazkur tashkilot mudirasi Soliha Latipova. — Endi 120 oʻrinli bu binoda mahallamiz bolalarining jismoniy va aqliy rivojlanishi, maktabga tayyor holda borishi uchun barcha qulayliklar yaratilgan. Bu yurtimizda yosh avlod taʼlim-tarbiyasiga ustuvor vazifa sifatida qaralayotgani nishonasi, albatta.

Mamlakatimizning barcha goʻshalarida kuzatilayotgani kabi keyingi yillarda Buxoro tumanida ham jajji oʻgʻil-qizlarni maktabgacha taʼlim tashkilotlariga qamrab olish masalasiga jiddiy eʼtibor qaratilmoqda. Mulkchilikning turli shaklidagi bogʻchalar tashkil etilyapti. Ayni damda tuman boʻyicha 135 ta shunday muassasa faoliyat koʻrsatmoqda. Ularda 3-7 yoshdagi bolajonlarning 10 ming nafardan ziyodi qamrab olingan.

Istam IBROHIMOV

“Xalq soʻzi”.