Foto: Anvar Ilyosov olgan surat («Dunyo» AA)

Oʻzbekiston tashqi ishlar vaziri Baxtiyor Saidov kecha Toshkent shahrida Buyuk Britaniyaning tashqi ishlar, Hamdoʻstlik va taraqqiyot masalalari boʻyicha davlat kotibi Devid Kemeron bilan uchrashdi.

«Londonga qaytish chogʻida Toshkentda toʻxtab oʻtgan Buyuk Britaniyaning tashqi ishlar, Hamdoʻstlik va taraqqiyot masalalari boʻyicha davlat kotibi Devid Kemeron janoblari bilan uchrashishdan mamnunmiz, – deb yozdi Oʻzbekiston TIV rahbari oʻzining telegram kanalida. – Yana bir bor Oʻzbekiston – Buyuk Britaniya hamkorligini aniq natijalar bilan boyitish uchun barcha imkoniyatlarimizdan foydalanishga tayyorligimizni tasdiqladik».

Eslatib oʻtamiz, 23-aprel kuni Oʻzbekiston tashqi ishlar vaziri Baxtiyor Saidov va Buyuk Britaniyaning tashqi ishlar, Hamdoʻstlik va taraqqiyot masalalari boʻyicha davlat kotibi Devid Kemeron Toshkentda muzokaralar oʻtkazgan, shuningdek, uning yakunlari boʻyicha tomonlar Keng qamrovli sherikchilik toʻgʻrisidagi deklaratsiya hamda Mintaqaviy va xalqaro bogʻliqlik hamda infratuzilma sohalaridagi hamkorlik toʻgʻrisidagi anglashuv memorandumini imzolagan edi.