Samarqandda xorijdan yozgi taʼtilda buvisinikiga kelgan 16 yoshli maktab oʻquvchisi burun operatsiyasidan soʻng viloyat shifoxonasida vafot etdi. Bu haqda “Milliy” telekanalida xabar qilindi.

Qayd etilishicha, qiz nafas olishda qiynalayotgani uchun 1-iyul kuni buvisi bilan viloyat markaziy shifoxonasiga borgan. Shifokorlar unga jarrohlik amaliyoti oʻtkazilishi kerakligini aytishgan.

“Uchta shifokorni koʻrdim. Uchalasi ham shu operatsiya qilish kerakligini aytishdi. Burni “mahkam” ediyu, salgina qiyshiq ekan. Soat 11 larda operatsiyaga olib kirdi. Kutdim, lekin operatsiya davom etayotganini, nabiram hali hushiga kelmaganini aytishdi. Taxminan bir yarim soat oʻtgach, operatsiya boʻlimiga bir guruh shifokorlar apparati bilan kirib kelishdi», degan marhumaning buvisi.

Kasalxonada aytilishicha, operatsiyadan keyin bemorning salomatligi yomonlashgan va u vafot etgan. Fuqaroning yaqin qarindoshlari hodisada shifokorlarni aybdor deb hisoblamoqda.

Maʼlum qilinishicha, viloyat prokuraturasi tomonidan sud-tibbiy ekspertiza tayinlandi. Hozirda tergovga qadar tekshiruv va rasmiy tekshiruvlar olib borilmoqda.

Taʼkidlash joiz, bu qizcha shu turdagi operatsiyalarda vafot etganlarning birinchisi emas. Avvalroq ham Fargʻona viloyatining Fargʻona shahrida joylashgan xususiy klinikada burnini operatsiya qildirgan 33 yoshli prokuratura xodimi vafot etgani haqida xabar qilgandik.

Ushbu fuqaro ham operatsiya qildirish uchun oʻz oyogʻi bilan kirgan, biroq qaytib chiqmagandi. Operatsiya soat 18:00 da boshlangan, 22:30 da esa bemorning vafot etgani maʼlum boʻlgan.