Foto: Spot

Prezidentning ““Oʻzbekiston – 2030” strategiyasini “Atrof-muhitni asrash va “yashil iqtisodiyot” yilida amalga oshirishga oid davlat dasturi toʻgʻrisida”gi Farmoni ijrosiga muvofiq, “Oʻzbekneftgaz” AJ tomonidan bosqichma-bosqich yuqori oktanli (Ai-92) avtobenzin ishlab chiqarishga oʻtish va sentyabr oyidan boshlab birja savdolariga faqat yuqori oktanli avtobenzin joylashtirilishi rejalashtirilgan edi.

Shu bois, “Oʻzbekneftgaz” aksiyadorlik jamiyati 2025-yil 2-sentyabrdan boshlab, Ai-80 benzinini birja savdolari orqali sotishni toʻxtatdi, deb xabar bermoqda AJ matbuot xizmati.

Bildirilishicha, oʻz navbatida Ai-92 rusumidagi avtobenzinning birja savdolariga chiqarish hajmlari oshirildi. Shu vaqtga qadar 1000 tonna Ai-92 benzini savdolarga qoʻyilgan boʻlsa, bugungi kunda bu raqam 1720 tonnani tashkil etmoqda.

“Ichki bozor talabidan kelib chiqib, bu hajmlarni oshirish imkoniyati mavjud”, deyiladi xabarda.

Qoʻshimcha qilinishicha, joriy yil avgust oyida tadbirkor isteʼmolchilar tomonidan xarid qilingan Ai-80 rusumidagi avtobenzin hajmlari majburiyat va mavjud qoldiqlar doirasida sentyabr oyida ham oʻz egalariga yetkazib beriladi.