Foto: “Xalq soʻzi”

Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi hamda Birlashgan Millatlar Tashkilotining Oziq-ovqat va qishloq xoʻjaligi tashkiloti (FAO) bilan hamkorlikda amalga oshirilayotgan «Oʻzbekistonda oziq-ovqat tizimlarining yerdan foydalanish va qayta tiklashga taʼsirini baholash dasturi» loyihasi doirasida bioxilma-xillikni koʻpaytirish hamda global atrof-muhit uchun ishlab chiqarish landshaftlarida ekotizimlarni saqlash va tiklash maqsadida qiymati 1,1 mln. AQSH dollari miqdorida kelishuv imzolandi.

Mazkur kelishuv orqali mamlakat boʻyicha tanlab olingan hududlarda sugʻoriladigan va lalmikor yer maydonlarining landshaftida barqaror oziq-ovqat ishlab chiqarish uchun ilgʻor va barqaror texnologiyalarni joriy etish koʻzda tutilmoqda. Shuningdek bioxilma-xillikni saqlash va yaxshilash boʻyicha hamda ulardan oqilona foydalanish uchun samarali boshqarish amaliyotlari maydonini 50 000 ga yetkazilishi belgilanmoqda.

Ishlab chiqarish landshaftlarida ekotizimlarni saqlash va tiklash hamda qishloq xoʻjaligini teng ravishda qoʻllab-quvvatlash orqali Global atrof-muhit yaxshilanishi koʻzda tutilmoqda. Shuningdek, ushbu sohada erishilgan eng yaxshi amaliyot hamda yaratilgan innovatsiyalar keng targʻib qilinadi.

Hukumat tomonidan vujudga kelgan ehtiyojlarni qondirish maqsadida yaroqlilik tahlili yondashuvi hamda mezonlari asosida yerdan foydalanish boʻyicha eksklyuziv, genderga bogʻliq tavsiyalar beriladi. Pirovard natijada qishloq xoʻjalik ekinlaridan va yerdan foydalanishni diversifikatsiya qilishda barqaror ekotizimlar uchun asos yaratiladi.