Jamiyatimizning tezkor taraqqiyoti, fan-texnika rivoji yoshlarni maktab chogʻidanoq izlanishga chorlamoqda. Uchqoʻrgʻon tumanidagi 19 — umumtaʼlim maktabi oʻquvchilari Muhammadamin Noʻmonjonov hamda Islomjon Mahmudjonovlarning intilishlari bunga misol. Fanlarni oʻzlashtirish bilan cheklanib qolmasdan innovatsiyaga qoʻl urgan ikkovlon yaqinda “Aqlli parta” qurilmasini ishlab chiqishdi. Loyiha informatika fani oʻqituvchisi Husanboy Ergashev rahbarligida sakkiz oy davomida olib borilgan ilmiy-amaliy harakatlar natijasida ijrosini topdi.

- “Aqlli parta” anʼanaviy partalardan bir qator qoʻshimcha imkoniyatlari bilan farqlanadi, -deydi iqtidorli oʻquvchilarning ustozi H. Ergashev. – Unga maxsus mikrokontroller oʻrnatilgan boʻlib, tasvirga olish va video uzatish ishlarini bajaradi. Bu bilan oʻquvchining darsdagi ishtiroki, xususan, mavzuni tinglash va oʻzlashtirish holatini nazorat qilish mumkin. Uning natijasi SMS xabarnoma yuborish orqali bolaning ota-onasini xabardor etadi. Bundan tashqari, parta yorugʻlikni boshqarish, qurilma balandligini sozlash, xona harorati hamda namlikni oʻlchash funksiyalariga ham ega. Alohida modul orqali shaxsni identifikatsiya qilish imkoniyati joriy etilgan.

Ayni paytda patentlashtirish harakati borayotgan ushbu “super parta” muqobillariga nisbatan 50 foiz yuqori samaradorlikka ega boʻlib, “Ixtirochilikka qadam” tanlovining respublika bosqichida eng ilgʻor 10 ta loyiha qatoridan joy oldi hamda 61 million soʻmlik vaucher bilan taqdirlandi.

Qudratilla NAJMIDDINOV, “Xalq soʻzi”.