AQSHning Illinoys shtati moliyaviy masalalar boʻyicha nazoratchisi Susana Angelina Mendoza boshchiligidagi ishbilarmonlar delegatsiyasi Andijon viloyatiga tashrif buyurdi. Mehmonlarni viloyat hokimi Shuhratbek Abdurahmonov Bobur nomli Andijon xalqaro aeroportida tantanali ravishda kutib oldi va shundan soʻng ikki tomonli hamkorlikdagi istiqbolli loyihalar muhokamasiga kirishildi.

Muloqotda viloyat rahbari mehmonlarni Andijonda koʻrishdan mamnunligini bildirdi va Oʻzbekiston bilan AQSH oʻrtasidagi munosabatlar yildan-yilga mustahkamlanib, savdo-iqtisodiy, madaniy va taʼlim sohalarida hamkorlikning kengayib borayotganini taʼkidladi. Shuningdek, investitsiya va qoʻshma loyihalarni amalga oshirish imkoniyatlari ham muhokama qilindi.

Delegatsiya aʼzolari Andijonda yangi loyihalarni yoʻlga qoʻyish, xizmat koʻrsatish va logistika sohalarida hamkorlikni rivojlantirish masalalarida fikr almashdi. Shu orqali muloqotda ikki davlat oʻrtasidagi iqtisodiy va investitsiyaviy aloqalarni yanada mustahkamlashga qaratilgan takliflar va loyihalar ilgari surildi.

Saminjon HUSANOV

“Xalq soʻzi”.