Voha uchun yangi “Amu – Buxoro–1” nasos stansiyasining ahamiyati katta. U orqali yetkazib berilayotgan suv minglab gektar ekin maydonlari, bogʻ-rogʻlarni suv bilan taʼminlab, qishloq xoʻjaligi yerlarini choʻllanish xavfidan asrashga xizmat qiladi. Inshoot “Amu – Buxoro” mashina kanali Olot tuman boshqarmasi tasarrufidagi hududda barpo etildi.

Nasos stansiyasi “Osiyo tiklanish va taraqqiyot banki” ishtirokida amalga oshirilayotgan irrigatsiya tizimlarini qayta tiklash loyihasi doirasida qurildi. Qiymati qariyb 83 million AQSH dollarini tashkil etgan mazkur obyektda qurilish-montaj ishlari Xitoy Xalq Respublikasining “China National Technical Import and Export Corporation” kompaniyasi tomonidan amalga oshirildi.

Inshootda yuqori ish unumdorligiga ega 8 ta nasos agregati hamda zamonaviy energiyatejamkor asbob-uskunalar oʻrnatildi. Natijada nasos stansiyasining umumiy suv chiqarish quvvati soniyasiga 90 kub metrga yetkazildi.

Eʼtiborlisi, loyiha doirasida yana bir muhim obyekt — “Amu – Buxoro–2” nasos stansiyasida ham modernizatsiya ishlari amalga oshirildi.

Maʼlumot oʻrnida aytish joizki, “Amu – Buxoro” mashina kanali birinchi navbati 1965-yilda, ikkinchi navbati esa 1976-yilda qurilgan. Ushbu kanallar orqali suv nasos stansiyalari yordamida yuqoriga koʻtarilib, qishloq xoʻjaligi ehtiyojlari uchun yoʻnaltiriladi.

Istam IBROHIMOV, “Xalq soʻzi”.